وبعدين معاكي يا نقابة

مش عارف ليه كل ما بتيجي سيرة النقابة في أي حاجة ماباتفائلش ، جايز لأن كل خبراتي السابقة مع النقابة كانت خبرات سلبية، المهم إنه الشهر اللي فات كنت في النقابة وبالصدفة كمان كنت في لجنة التعليم الطبي المستمر اللي عاملينها فوق السطوح، وخطر لي إني أسأل ما عندكوش دورات قريب في أي حاجة تخص القلب أو العناية المركزة، وجاوبني الموظف المختص إنهه عاملين دورة إيكو في معهد القلب وإن الدورة دي هتبدأ في 13 يونيو ولمدة شهر،
طبعاً حاجة زي دي بالنسبة لي ماتتفوتش، الغريب انهم مش عاملين إعلان عن الدورة مع إن كان فاضل على معادها أقل من 3 أسابيع،
المهم قلت أدفع الرسوم وألحق أحجز مكان وطبعاً عرفت زمايلي وأصدقائي وبعضهم كمان سجل في الدورة ودفع الرسوم، يوم ما كنت باسجل قعدت أتأكد وأستوثق من الموظف عن الموعد وهل هو نهائي ولا فيها احتمالات للتأجيل، والراجل الصراحة بكل ثقة قعد يطمني إن الكلام ده نهائي وكل شيء جاهز ومحجوز، برضه ماكنتش مطمئن،
بس رتبت كل أموري على هذا الأساس، خضت معركة علشان أعدّل جدول النوبتجيات وكمان اضطريت أسيب العمل الخاص وأجيب واحد مكاني، وأجلت التزامات أخرى كانت هتتعارض مع الدورة المنشودة دي، وقلت مش مشكلة كله في سبيل العلم، وخصوصاً إن الإيكو ده حاجة أساسية في شغلنا وفرص تعليمه قليلة، فوجئت بالاستاذ الموظف المسئول إياه بيتصل عليا قبل معاد الدورة بيومين علشان يقول احنا آسفين الدورة اتأجلت أسبوعين، طبعاًَ هو لو كان واقف قدامي كان زماني ارتكبت جريمة، طبعاً استفزتني اللا مبالاة وخصوصاً لما سألت عن سبب التأجيل فقال لي إن القاعة اللي هتكون فيها المحاضرات هاتبقى مشغولة (مع إنه كان بيؤكد قبل كده إنها محجوزة)، طيب أنا عايز أعرف دلوقت ممكن أشتكي النقابة دي لمين؟
حاجة تانية مضايقاني أكتر من التخبط الإداري اللي بتتميز بيه نقابتنا العزيزة، هي حرصهم المبالغ فيه على معظم مظاهر التدين (وده في حد ذاته مش وحش) بس لما يكون الحريص على التدين ده منظومة فاشلة بكافة المقاييس، ده بيولد نوع من الترابط ولو على مستوى اللاوعي بين التدين والفشل، وخصوصاً إننا بنعيش وقت يسوده نوع من التربص بالدين والمتدينين،
عموماً أنا منتظر الدورة دي تبدأ ويا رب ما يكونش فيها تأجيلات تانية ، وخليتا ورا النقابة لباب الدار