تعليق بدون تعليق

"الشرطة تقتل شابا يصفه البعض بالوسيم فى الشارع فى الأسكندرية !
… ماذا نقول ؟ … بداية جيدة !" ........
......"فالأفضل ‑فى ظل الانفجار السكانى‑ أن يموت مائة برىء من أن يفلت من العقاب مجرم واحد" ..........
.........."وصاحبنا المذكور يقال عنه أنه موزع عقاقير وبالتالى نرى أن من حق الشرطة أن تفعل به ما تراه مناسبا" ..........
........."( ملحوظة : نحن لسنا ضد إباحة العقاقير لكن ضد الفوضى الأمنية )" .

اقتباسات من تعليق مدحت محفوظ على مقتل الشاب خالد سعيد بالإسكندرية!!!

سي مدحت محفوظ مرة تانية

الراجل ده غريب جداً، المشكلة إنه كون قناعات غاية في الشطط والتطرف، وبيعتبرها بدهيات وبيدافع عنها باستماته، وبيستنكر ان أي حد بيناقش أو بيعترض عليها، وكل أفكاره وقناعاته مترابطة ببعضها بطريقة فظيعة ومعتمدة على بعضها، بحيث إنك لما تقرا كتير في موقعة تلاقيك محتار تجيله منين ولا منين،
أفكار الراجل ده بتبدأ بالمادية البحتة من أول رفض وجود إله خالق للكون إلى انطباق قوانين الفيزياء على كل حاجة في الدنيا زي الاقتصاد والاجتماع، وبيرجع كل حاجة عند البشر للجينات، الجينات هي اللي بتحدد كل حاجة بما فيها الدين اللي انت هتختاره أو تؤمن بيه، ومن الحاجات اللي قريتها عنده، هي تصنيفه للأجناس البشرية من الأرقى والأسمى للأحقر والأحط، وطبعاً حط اليهود في أسمى طبقة وبعدهم المسيحيين البروتستانت، وفي ذيل القائمة يأتي الأرثوذوكس ثم العرب (اللي كلامه عنهم بيحسسك إنه مستخسر حتى يحطهم في تصنيف واحد مع البشر)، أما أظرف حاجة بقى في الموقع كله لما يجي يتكلم عن الجنس ويقول لك إن صناعة الجنس (الدعارة يعني) دي أسمى مهنة وما إلى ذلك من الكلام المضحك، ومن اللي لفت انتباهي برضه هو دعواته المتكررة لإبادة العرق العربي بالكامل حتى يستريح العالم كله من شرورهم، وأي كارثة أو مصيبة تحصل في أي حتة في العالم بيدور على أي واحد عربي يلزقها فيه مهما كانت ملهاش علاقة بالشخص المنسوبة إليه، وكمان من الحاات الظريفة اللي تقراها عنده هو نبوءاته بإن الجنس البشري هينقرض بحكم التطور الطبيعي وإن الآلات الذكية هاتحكم العالم، وفي الآخر بعد ما كون مجوعة الأفكار العظيمة دي وغيرها راح مألف رواية عقيمة، بيجمع فيها معظم أفكاره وبيعرضها من خلال حوارات مطولة ودمها تقيل، ومن كتر مالكلام في الحوار شبه بعضه ممكن تتوه في النص وما تعرفش هو مين اللي قال الجملة، ومين اللي رد على مين، واللي زاد وغطى إنه من بعد ما نزل الرواية بقت معظم استشهاداته بالرواية نفسها، حاجة خلت الموقع بقى دمه تقيل أكتر من الأول.
والطريفة اللي بيتكلم بيها بتحسسك انه مغرور بنفسه جداً، كان ممكن في الأول أفكر في ان الراجل ده عليم ببعض الأشياء الخافية عن اكتر الناس وعلى دراية ببواطن الأمور بسبب الثقة الزيادة اللي في كلامه، بس موضوع التهكم الشديد بصورة مزرية اللي ساد موقعه من فترة، وكمان حكاية الاستشهاد بروايته (زي ما تكون روايته دي حجر رشيد اللي هيفك طلاسم كل حاجة في الدنيا)، والكلام اللي أحياناً بيقوله عن نفسه وموقعه زي انه أول موقع شخصي باللغة العربية، وأكثر المواقع الشخصية على الويب من حيث عدد الزيارات، وتأكيداته المتكررة على أي حاجة تحصل في الدنيا إنه اتنبأ بيها قبل كده (يا عم ما انت كاتب كلام كتير جداً واتنبأت بكل حاجة ممكن تحصل وممكن ما تحصلش في الدنيا كلها)، كل ده خلاني كونت رأي شخصي عنه إنه مغرور بدرجة مرضية.

مدحت محفوظ

نفسي أعرف مين هو مدحت محفوظ ده ، عايز أعرف عنه معلومات شخصية، نشأته، أهله ، حياته.
ممكن حد يسألني مين هو سي مدحت ده هاقولك كل اللي اعرفه عنه انه ناقد سينيمائي وموقعه الشخصي http://www.everyscreen.com اللي هو عمله منبر لبث أفكاره شديده التطرف في اتجاه العلمانية،
طيب إيه اللي يخليني عايز أعرفه قوي كده، مش عارف بالضبط بس هو أكيد نوع من الفضول، أنا قريت كتير من كلامه اللي في الموقع وقريت روايته سهم كيوبيد اللي هو حاططها على الموقع ومضمنها معظم أفكاره ورغم ذلك لما أدور على النت على أي حاجة عنه مل ألاقيش غير موقعه وشوية مقتطفات منه متنطورة في المدونات.
على فكرة ، رغم اختلافي معاه في معظم كلامه واعتراضي على أكتر أفكاره بس ما أقدرش انكر اني استفدت منه كتير جداً، مثلاً كلامه في الاقتصاد فهمت منه كتير وخدت فكره عن اللعب في البورصة ممكن يبقى ازاي، واتعلمت منه حاجة مهمة جداَ وهي ان أساس نجاح أي مشروع اقتصادي انه يسد حاجة لدى المجتمع ، وأي مشروع غير كده بيبقى مجرد ظاهرة وبتختفي بسرعة حتى لو حقق نجاح وقتي قصير.
كنت عايز اكتب حاجة من اعتراضاتي على كلامه بس للأسف مش فاضي دلوقت، هابقى اكتبها وقت تاني بإذن الله.