Tuesday, June 30, 2009

مكعب روبيك!










تحديث:
لو كنت تبحث عن طريقة حل مكعب روبيك اذهب إلى هنا


لعبة جميلة وممتعة إلى حد كبير وتتميز باستخدام العقل ويمكنك بها قضاء أوقات الانتظار وأوقات السفر بدون أن تشعر، لا أدري لماذا لا ينتشر هذا النوع من الألعاب في بلادنا العربية، فعندما أحضرت أول نموذج أراه من هذه اللعبة وجدت أنه لا أحد يعرفها من المحيطين بي، حتى أنني لم أكن أعرف إسمها ولا طريقة حلها، كنت أعتقد أنها واحدة من ألعاب الألغاز العادية ولكن بعد أن قمت بخلط مربهاتها لم أتمكن من إعادة ترتيبها، وبما أنني لا أستسلم بسهولة فقد قضيت ليلتها على الإنترنت في البحث عن طريقة لحلها، أول مشكلة واجهتني كانت أنني لا أعرف اسم اللعبة أصلاً فأدخلت كلمة بحث أخرى هي المكعب السحري (magic cube) ولحسن الحظ خرجت لي بعض النتائج وعرفت منها الاسم الحقيقي للعبة، عموماً اسم المكعب السحري كان هو الاسم القديم للعبة ثم سميت بعد ذلك بمكعب روبيك على اسم مخترعه عالم الرياضيات المجري إيمو روبيك، ودهشت عندما عرفت أن هذه اللعبة اختراع معاصر ولم تظهر في الأسواق إلا سنة 1980، حيث كنت أتوقع أن تكون اختراعاً صينياً أو هندياً قديماً أو شيئاً من هذا القبيل، وطبعاً لم أنم ليلتي إلا بعد ما تمكنت من حل اللغز وإعادة ترتيب مربعاته، وبعد ذلك اطلعت على أكثر من استراتيجية لحلها وكونت استراتيجيتي الخاصة بي، أتمنى أن نجد هذا النوع من الألعاب منتشراً في بلادنا حيث أنني أعتقد أنها تساهم في دعم النمو العقلي للأطفال.

Sunday, June 28, 2009

السواقة في مصر

الواحد مش عارف يروح فين في البلد دي، نفسي أسوق العربية في الشارع وأنا مش متنرفز ولا متعصب، بس واضح إني علشان أعمل كده لازم أقضي مشاويري بعد الفجر على طول، وعلى فكرة أنا كنت باعمل كده أيام امتحانات البكالريوس فعلاً، كنت باخرج من البيت بعد الفجر على طول مع ان الطريق للكلية كان بياخد 45-50 دقيقة، أنا هنا طبعاً باتكلم على السواقة على طرق الأرياف مش السواقة داخل المدن أو على الطرق السريعة اللي بتعتبر نعيم بالنسبة للطرق اللي باقول عليها، يوم الجمعة اللي فات كان عندي مشوار سريع والطريق المفروض يباخد 30-40 دقيقة، وخرجت من البيت الساعة 3 ونص عصراً وكان الطريق هادي كعادة الطرق نواحينا في هذا التوقيت حيث يوم الأجازة والدنيا حر وماحدش هايخرج من بيته إلا مجبر، وكان المشوار في طريق ما مشيتش عليه من فترة طويلة، ولقيت الطريق متكسر ومتبهدل علشان مشروع صرف صحي أو حاجة من هذا القبيل، ووصلت خلال ساعة أو أكثر قليلاً، وطبعاً العربية اتبهدلت على الآخر، وأنا راجع كان قدامي 3 خيارات لطرق بديلة ولكن وجدت أن 2 منها برضة مشغولة بأعمال حفرلأسباب مختلفة فلم يكن أماي سوى طريق واحد هو أطولهم وأضيقهم، وطبعاً كانت معاناة مريرة ، المشكلة إننا في مصر ماعندناش مبدأ احترام الطريق، وكل واحد بيتصرف كأن الطريق ده ميراثه من بقية أهله يعمل فيه اللي هو عايزه، من أكتر الحاجات اللي بتضايقني مثلاً السواقين المتخلفين عقلياً اللي بيوقفوا عربياتهم على الطريق ولازم طبعاً تكون كلها على الأسفلت علشان يغسلها، ومش مشكلة عنده أن عرض الطريق أصلاً يكفي بالكاد لمرور سيارة أخرى وأن الطريق فردي وعليه حركة كبيرة، المهم ان عربيته تتغسل بدون ما يطين تحتها، ويشاركهم في ذلك سائقي التكاتك، وطبعاً دي أقل بلاويهم ، التكاتك دي مجرد منظرها على الطريق كافي لاستفزازي، فما بالك إذا كانت ماشية بدون مراعاة لأي قاعدة أو قانون ، مافيش مشكلة عندي يمشي في اليمين أو الشمال ولا في التنقل بينهما وطبعاً الوقوف في أي وقت أو أوان، والإشارات بالنسبة له مجرد زينة ليس لها استخدام غير علشان تدي منظر للتكتك في الأفراح، ومن البلاوي الكبيرة اللي بتقابلها الجرارت الزراعية اللي بتقعد ترقص في رشاقة على الطريق ولا تسمح لأي كان إنه يعدي منها، وغيره وغيره وغيره ، مش عارف أقول إيه وأسيب إيه، المهم ابقوا اتطمنوا عليّ لو غبت عنكم كتير لتكون مرارتي اتفقعت ولا جالي انهيار عصبي من الأشكال دي.

Sunday, June 14, 2009

وبعدين معاكي يا نقابة

مش عارف ليه كل ما بتيجي سيرة النقابة في أي حاجة ماباتفائلش ، جايز لأن كل خبراتي السابقة مع النقابة كانت خبرات سلبية، المهم إنه الشهر اللي فات كنت في النقابة وبالصدفة كمان كنت في لجنة التعليم الطبي المستمر اللي عاملينها فوق السطوح، وخطر لي إني أسأل ما عندكوش دورات قريب في أي حاجة تخص القلب أو العناية المركزة، وجاوبني الموظف المختص إنهه عاملين دورة إيكو في معهد القلب وإن الدورة دي هتبدأ في 13 يونيو ولمدة شهر،
طبعاً حاجة زي دي بالنسبة لي ماتتفوتش، الغريب انهم مش عاملين إعلان عن الدورة مع إن كان فاضل على معادها أقل من 3 أسابيع،
المهم قلت أدفع الرسوم وألحق أحجز مكان وطبعاً عرفت زمايلي وأصدقائي وبعضهم كمان سجل في الدورة ودفع الرسوم، يوم ما كنت باسجل قعدت أتأكد وأستوثق من الموظف عن الموعد وهل هو نهائي ولا فيها احتمالات للتأجيل، والراجل الصراحة بكل ثقة قعد يطمني إن الكلام ده نهائي وكل شيء جاهز ومحجوز، برضه ماكنتش مطمئن،
بس رتبت كل أموري على هذا الأساس، خضت معركة علشان أعدّل جدول النوبتجيات وكمان اضطريت أسيب العمل الخاص وأجيب واحد مكاني، وأجلت التزامات أخرى كانت هتتعارض مع الدورة المنشودة دي، وقلت مش مشكلة كله في سبيل العلم، وخصوصاً إن الإيكو ده حاجة أساسية في شغلنا وفرص تعليمه قليلة، فوجئت بالاستاذ الموظف المسئول إياه بيتصل عليا قبل معاد الدورة بيومين علشان يقول احنا آسفين الدورة اتأجلت أسبوعين، طبعاًَ هو لو كان واقف قدامي كان زماني ارتكبت جريمة، طبعاً استفزتني اللا مبالاة وخصوصاً لما سألت عن سبب التأجيل فقال لي إن القاعة اللي هتكون فيها المحاضرات هاتبقى مشغولة (مع إنه كان بيؤكد قبل كده إنها محجوزة)، طيب أنا عايز أعرف دلوقت ممكن أشتكي النقابة دي لمين؟
حاجة تانية مضايقاني أكتر من التخبط الإداري اللي بتتميز بيه نقابتنا العزيزة، هي حرصهم المبالغ فيه على معظم مظاهر التدين (وده في حد ذاته مش وحش) بس لما يكون الحريص على التدين ده منظومة فاشلة بكافة المقاييس، ده بيولد نوع من الترابط ولو على مستوى اللاوعي بين التدين والفشل، وخصوصاً إننا بنعيش وقت يسوده نوع من التربص بالدين والمتدينين،
عموماً أنا منتظر الدورة دي تبدأ ويا رب ما يكونش فيها تأجيلات تانية ، وخليتا ورا النقابة لباب الدار

Tuesday, June 2, 2009

موضوع إسقاط الجنسية عن المصريين المتزوجين بإسرائيليات

النهاردة بالصدفة لاقيت قناة الحياة بتعرض برنامج لمناقشة موضوع إسقاط الجنسية عن المصريين المتزوجين بإسرائيليات، الموضوع كانت طرحته الأخت ساره هنا ودار حواليه نقاش طويل في مدونتها، البرنامج كان من تقديم المذيعة اللي بصراحة باحترم عقلها وموضوعيتها الأستاذة رولا خرسا وكان مستضيف 3 أعضاء مجلس شعب وتقريباً كانوا بيتكلموا عن مشروع قانون هايقدموه لإسقاط الجنسية عن المصري اللي هيسافر لإسرائيل أو شيء من هذا القبيل، للأسف ما شفتش البرنامج من أوله بس أعتقد ان اللي شفته كان كفاية، اتنين من السادة الضيوف في الاستوديو انبروا للهجوم على المصريين المتزوحين بإسرائيليات بصورة مقززة ، هي مقززة لأنها مش مبنية على أي منطق مفهوم أو أسباب ملموسة وكمان عمالين يحدفوا بتهم شنيعة من قبيل الخيانة العظمي والتجسس لصالح الموساد والعمالة لإسرائيل، وطبعاً نصبوا نفسهم كمان ممثلين لأهل الناس دول وقالوا إن أهلكم متبريين منكم وما بيتشرفوش بيكم، وكل ده طبعاً بدون أي دليل ولكن كلام مرسل من الهوا، ولما استضاف البرنامج رئيس رابطة المصريين في إسرائيل ليعرض وجهة نظرة ما سابوهوش يقول جملتين على بعض وقعدوا يوجهوا له نفس التهم المعلبة بتاعتهم دي، الراجل استفزه ردهم وهاجم واحد منهم وقال له مصر هاتفضل متخلفة طول ما فيها متخلفين زيك أو حاجة زي كده، وبصراحة كان مشهد مرزي، بس اللي استفدناه إن الناس دي حتى لو كان اللي عملوه مش مقبول من المجتمع بصورة عامة في مصر بس لهم أسباب ومش أسباب واهية، وإن هذه العينة من السياسيين وأعضاء مجلس الشعب تستاهل الحرق بجاز لأنهم ناس ما بتفهمش ومش عايزة تفهم وبيستغلوا أي حاجة علشان يظهروا في وسائل الإعلام ويجعجعوا ويكسبوا لنفسهم شعبية واهية بين البسطاء والعامة، ومابيترددوش في انهم يعملوا أي حاجة في سبيل ده ولو كان ده في ضرر لفئة معينة من الناس ، وكمان ماعندوش مانع انه يتهم أي حد بأي تهمة بدون أي دليل.
أهم حاجة الواحد استفادها هي الإحصائية اللي قدمها رئيس رابطة المصريين في إسرائيل وأهم حاجة فيها هو ان عدد المصريين المتزوجين بإسرائيليلت يهوديات (إسرائيليات بجد يعني) هو 15 وإن بعض زوجاتهم دول أسلموا كمان يعني المشكلة الحقيقية أصغر بكتير مما تخيلناه جميعاً، ومعذرة لو كان فيه أي خطأ في النقل لأني بانقل من الذاكرة وكنت طالع من نوبتجية 24 ساعة مرهقة جداً

ad