لو رجع بيك الزمن هل ممكن تدخل كلية الطب تاني

سؤال سألته لي أختي، وبصراحة احترت في الجواب، وسبب الحيرة كان مركب، لأنها سألته وقت ما كانت بتملأ رغبات التنسيق الخاص بها لدخول الجامعة، وأنا كنت معترض على وضع الطب كرغبة أولى، وسبب اعتراضي هو إشفاقي على أختي من مشوار الطب الطويل والشاق، رغم علمي أن طباعها الشخصية ستساعدها على تحقيق النجاح في هذا المجال لو دخلته، ورغم ذلك فضلت لها دخول طب الأسنان لسهولة طريقه وفي نفس الوقت قربه من مجال الطب سواء على المستوى الاجتماعي أو العلمي والعملي، نعود لموضوعنا، طبعاً كان صعب جداً عليّ إني أقول لها ماتدخليش طب ولما تسأني السؤال ده أقول لها طبعاً هادخل طب برضه لو رجع بي الزمن، بس الأصعب كان إني أقول لها خلاف الحقيقة، وأقول لا مش هادخل طب، بصراحة رغم كل ما أواجهه من مصاعب ومشاكل في هذا المجال فلست أتخيل نفسي في غيره، ومش بس هادخل طب تاني، لأ وهاختار نفس التخصص كمان ، بصراحة أنا مش متخيل إني ممكن أحرم نفسي من ذلك الإحساس الجميل بالنشوة والسعادة لما يجعلك الله سبباً لشفاء مريض أو إنقاذ حياته، يا سلام لما يجيلك عيان عنده وذمة رئوية
(pulmonary edema)
ومش قادر ياخذ نفسه وحاسس إن روحه بتطلع، وتعالجه ويبدأ يشعر بالراحة
، وكذلك لو عيان صدمة جرثومية (إنتانية زي ما هو مكتوب في بعض المصادر)
Septic shock
وضغطه غير مسموع وفاقد الوعي وداخل في فشل كلوي حاد ، وتبدأ تشوف شغلك معاه وفي خلال خمس أو ست ساعات تلاقي ضغطه اتحسن ودرجة الوعي اتحسنت والكليتين بدأوا يشتغلوا وبيجيب بول بكمية معقولة، أي نعم بيكون طلع عينك بس بتحس إن تعبك كان له مردود، وطبعاً قمة النشوة دي بتحصل لما تسلم على عيان
Post-arrest
وهو خارج من العناية ماشي على رجليه، ده غير المتعة اللي الواحد بيحس بيها أثناء عمل أي مهارة يدوية في شغل العناية زي تركيب أنبوبة حنجرية أو قسطرة وريدية مركزية أو حتى طرفية، وغير ذلك، لدرجة إني أحياناً بكون متردد وخايف أكون باعمل الحاجة دي لأني عايز أعملها مش لأن المريض محتاجها وده بيخليني أعيد التفكر أكثر من مرة قبل ما أعمل الحاجة دي علشان أتأكد من وجود الداعي الصحيح لعملها، تيجي بعد ده كله تقول لي لو رجع بيك الزمن تدخل طب ولا لأ، هاقول أدخله تاني بس كنت هاشد حيلي أكتر في المذاكرة علشان يكون لي فرصة إني أشتغل في مكان أحسن، وعلى فكرة دخول كلية الطب ده ما كانتش رغبتي الشخصية لما دخلتها، بس كان رضوخا لرغبة الأهل وكل شيء قسمة ونصيب،
انت بقى يا عم ياللي بتقرا الكلام ده لو اتسألت نفس السؤال هاتقول إيه؟