أنا إيه اللي مقعدني في البلد دي

أول امبارح جالي عرض من إحد مكاتب السفريات للسفر للسعودية والعمل بمستشفى كبير هناك ولكن كممارس عام والمقابل معقول وهو 6000 ريال سعودي بس ده يتضمن بدل السكن، وطبعاً رفضت العرض لأني مش عاوز أسافر أشتغل ممارس عام، وحابب أشتغل في تخصصي أو قريب منه على الأقل، بس النهارده قريت الخبر ده وقعدت أسأل نفسي: أنا إيه اللي مقعدني في البلد دي؟؟


هناك هآخد ما يعادل 9000 جنيه مصري شهرياً في عمل له ساعات عمل محدده وأجازة أسبوعية معروفة ولو انطلب منك تشتغل في الأجازة هيبقى بمقابل إضافي مجزي، هنا طلعان عيني في الشغل في مستشفى حكومي وآخر خاص وبيطلع في آخر الشهر دخلي حوالي 1600-1800 جنيه مصري، لما أنا هنا عايش في قرية وقرفان من سوء مستوى الخدمات والمواصلات الغير آدمية وتدني البيئة الاجتماعية اللي أنا عايش فيها، هناك هاعيش في مدينة كبرى، يعني أحسن خدمات وطرق، وهنا عايز أحوش كل فلوس شغلي لمدة سنة على الأقل علشان أشتري عربية عرجاء (ده باعتبارإن الفيات دي عربية)، هناك بمرتب شهر واحد أو شهرين هلاقي عربية معقولة تناسب احتياجاتي، وحتى البنزين هناك سعره أرخص من هنا، حتى هناك علبة البيبسي ( الللي بقولوا عليها هنا كانز) بريال واحد (يعني تقريباً جنيه ونصف) وحجمها 355 مللي لتر، هنا بـ 2 جنيه وربع وحجمها 330، اللحمه هناك بقت أرخص والعيش هناك أرخص وأحلى وأطعم وما تنساش كمان التميس (ويا سلام على التميس .... آه يا مصريين لو تعرفوا يعني إيه تميس... على فكرة ده لوحده ممكن يخليني أرجع أغير رأيي وأسافر ) ، وهناك لما ولادي ييجوا يدخلوا مدارس هلاقي تعليم حكومي مجاني بمستوى جيد مش هلاقي نصه هنا بمصاريف سنوية بالآلاف، مكالمة المحمول هناك أرخص، المحمول نفسه هناك أرخص وكل الأجهزة الكهربائية هناك أرخص، حتى هناك لما باعوز أشتري هدوم بانزل ألف ساعة ولا ساعتين ألاقيني اشتريت طقمين ولا تلاتة وبسعر معقول جداً ، هنا ممكن ألف أسبوع وما ألاقيش حاجة تناسبني من ناحية الذوق والمقاس والسعر وفي الآخر بألجأ للتفصيل وبسعر أغلى، و و و و و .... بجد أنا إيه اللي مقعدني في البلد دي؟؟؟

افتكرت بيت الشعر اللي بيقول:
بــلادٌ ألــفــنــاهـا عـلـى كــل حـالــة
وقد يؤلف الشيء الذي ليس بالحسن
وتستعذب الأرض التي لا هوى بها
ولا مـاؤهـا عـذب لــكــنـهـا وطـــن